Buugga Aabe Qani ah Aabe Faqiir (Rich Dad Poor Dad by Robert T. Kiyosaki) Oo Kooban

Buugga haddaan Saddex Jumlad ku soo koobo:

• Buuggan Aabbee Qani Aabbe Faqiir wuxuu ku saabsan yahay Robert Kiyosaki iyo labadiisa aabe, - aabihiisa dhabta ah (aabbaha faqiirka ah) iyo aabbaha dhalay saaxiibkiisa ay isku iskuulka ahaayeen (aabbaha taajirka ah) - iyo siyaabaha ay labadan aabbe u qaabeeyeen fikradihiisii ku saabsanaa lacagta iyo maalgashiga.

• Uma baahnid inaad heysato dakhli sare si aad taajir u noqoto.

• Dadka taajiriinta ah ayaa ka yeela lacagtooda mid u shaqeysa iyaga.

Shanta Fikradood ee Ugu Waaweyn

1. Dadka faqriga ah iyo dadka dabaqadda dhexe waxay u shaqeeyaan lacag darteed. Halka dadka taajiriinta ahna ay lacagta iyaga dartood ay u shaqeeyso.

2. Muhiim ma aha inta lacag ee aad kasbato. balse waxaa muhiim ah inta kuu harta.

3. Dadka taajiriinta ah waxay hantiyaan hanti. Dadka faqriga ah iyo dabaqadda dhexe waxay hantiyaan masuuliyado/kharashaadyo "liability" ay u haystaan ​​inay hanti yihiin.

4. Kartida dhaqaale waa waxa aad ku samayso lacagta marka aad samayso, sida aad dadka uga ilaaliso in aanay kaa qaadanin, sida aad u sii heysan laheyd waqti dheer, iyo sida aad lacagta uga yeeli laheyd mid iyada kuu shaqeyso.

5. Hantida kaliya ee ugu awooda badan ee aan dhamaanteen leenahay waa maskaxdeena.

Casharada Buugga Aabbe Qani Aabbe Faqiir:-

Casharka 1-aad: Taajiriinta Lacagta darteed uma Shaqeeyaan

Casharka 2-aad: Maxaan u Baranaynaa Dhaqaalaha?

Casharka 3-aad: Abuur Ganacsigaaga kuu gaarka ah.

Casharka 4-aad: Taariikhda Cashuuraha iyo Awooda Shirkadaha

Casharka 5-aad: Lacagta waxaa soo hindisay Dadka taajiriinta ah.

Casharka 6-aad: U shaqeey inaad wax-barato, Ha u shaqeynin inaad lacag hesho.

Aabbe Qani Aabbe Faqiir Oo Kooban:-

• "Waxaa jira farqi u dhexeeya faqriga iyo lacag la'aanta. Lacag la'aanta waa waqti ku meel gaar ah ha dheeraato ama ha dhawaato. balse Faqriga waa xaalad lagudaa'im noqdo ilaa maskax cusub lala yimaado".

• "Lacagtu way timaadaa wayna tagtaa, laakiin haddii aad leedahay waxbarasho ku saabsan sida ay lacagtu u shaqeyso, waxaad heysataa awood oo waxaad bilaabi kartaa dhisitaanka hodonnimadaada."

• "Nolosha dadka waxaa maamula laba dareen oo kala ah: cabsi iyo hunguri/damac."

• "dad badan ayaa yidhaahda, 'Aniga, ma xiiseeyo lacagta.' Haddana waxay aadaan shaqo ay maalin walba sideed saac ku qaadanayaan."

• "In aad ku fikirto in haddii aad shaqo heysato aad badbaadayso, waa adigoo naftaada been u sheegay."

• "Caqli badnaanta waxay xallisaa dhibaatooyinka waxayna abuurta fursado iyo hanti."

• "Waa inaad ogaataa farqiga u dhexeeya hantida iyo mas'uuliyadda, oo iibsato hantida."

• Hantidu waxay gelisaa jeebkaaga lacag, Mas'uuliyadda waxay jeebka ka bixisaa lacag.

• "Aqoon la'aantu, hadday tahay hadal iyo tiraba, waa aasaaska halganka dhaqaale."

• "Lacagtu waxay inta badan soo muujisaa ceebaha bini'aadamka, iyada oo soo iftiimisa waxa aynaan garanayn."

• "Dhaqdhaqaaqa ama qulqulka kaashka ah waxa uu sheegaa sheekada ah sida uu qofku lacagta u maamulo, siday kusoo gashaa, intee kaasoo gashaa iyo siday kaaga baxdaa, inteena ku baxdaa."

• "Dadka intooda badan ma fahmaan sababta ay ugu dhibaatoodaan dhaqaalahooda sababta oo ah ma fahmaan socodka ama qulqulka lacagta soo gasha."

• "Kharashka koowaad ee dadka badankiisu waa canshuurta."

• Dakhliga sare waxaa la socda canshuur sare. Tani waxaa loo yaqaan "bracket creep."

• "Lacag badan way yar tahay inay xaliso dhibaatooyinka lacageed ee qofka."

• "Cabsida ah inuu ka duwanaado dadka kale ayaa inta badan qofka ka hor istaagta inuu raadiyo habab cusub oo uu ku xaliyo dhibaatooyinkiisa."

• "Qofku wuxuu noqon karaa mid aqoon sare leh, xirfad ahaan guulaystay, hadana dhaqaalaha wax ka aqoon ama hanti heysan."

• "Dhibaatooyin dhaqaale badanaa waxaa keena isku dayga in aad la tartanto dadka kale oo aad gadato wax walba oo ay gataan."

• Marka aad fahamto farqiga u dhexeeya hantida iyo deymaha, xoogga iyo dadaalkaaga saar iibsashada hantida dakhliga soo saarta.

• "Hantidu waa awoodda qofku u leeyahay in uu hore usii noolaado tiro maalmo ah, haddii uu joojiyo shaqada maanta, intee maalin buu sii noolaan karaa?"

• “Tajaarku wuxuu iibsadaa hanti. dadka faqiirinta ah waxay maareeyaan ​​kharashaadkooda oo kaliya. dabaqada dhexena waxay iibsadaan masuuliyado ama deymo ay u malaynayaan inay hanti tahay."

• "dadka taajiriinta ah waxay diiradda saaraan tirada hantida ay heystaan halka dadka kale ay diiradda saaraan dhaqdhaqaaqa dakhligooda."

• "Halgan maaliyadeed inta badan wuxuu si toos ah uga yimaadaa dadka oo u shaqeeya qof kale noloshooda oo dhan ."

• "Khaladka ugu weyn waa in dad badan ay iloobaan inay maskaxdooda iyo dhididkooda kaga fikiraan inay dhisaan ganacsigooda ugaarka ah. Waxay noloshooda ku qaataan inay ka fikiraan oo ay dhisaan ganacsiga qof kale oo ay qofkaas ka dhigaan mid qani ah."

• "Baabuurka cusub ayaa lumiya ku dhawaad ​​boqolkiiba 25 qiimaha aad ku bixisid marka aad ka kaxayso tukaanka."

• "Kharashaadka yaree, dhin deymaha, oo si taxadar leh u dhis saldhig hantiyeed oo adag."

• Qoraaga ayaa sheegaya in uu leeyahay ganacsi aan u baahnayn joogistiisa. "Haddii ay tahay inaan halkaas ka shaqeeyo, ma ahan ganacsi. Waxay iinoqotay shaqadayda."

• Sida uu leeyahay Qoraaga, hantida dhabta ah waxay u kala baxdaa qaybaha soo socda:

1. Saamiyada

2. Hantida maguurtada ah ee dakhliga soo xareysa

3. Lacagaha laga helo hantida garaadka sida muusiga, qoraalada, iyo shatiyada

4. Wax kasta oo kale oo qiimo leh, oo soo saara dakhli ama la qiimeeyn karo, oo leh suuq diyaarsan.

• Bilaw inaad abuurto ganacsigaaga kuu gaarka ah. Hayso shaqadaada maalmeedka ah, balse bilow ganacsi gees socda.

• Marka Qoraaga oranayo Abuur Ganacsigaaga kuu gaarka ah, wuxuu ula jeedaa dhisidda iyo maareynta liis hantiyeed xooggan. Mar hadduu dollarku galo, waligiis ka soo bixin.

• "qiimaha ay leedahay lacagta waa in ay shaqeyso 24 saacadood maalintii iyadoo shaqayn karto jiilal."

• "Farqiga muhiimka ah ayaa ah in dadka hodanka ah ay iibsadaan waxyaabaha raaxadda marka ay yoolka ay lahaayeen gaaraan kadib, halka dadka faqriga ah iyo dabaqadda dhexe ay u muuqdaan inay iibsadaan raaxada marka ugu horeyso ay fursad u helaan."

• "Raaxada runta ah waa abaal-marinta ka timaada maal-gelinta iyo horumarinta hanti dhab ah."

• "Haddii aad lacag u shaqeyso, waxaad awooda siisay cidda aad u shaqaynayso. Haddii lacagtu kuu shaqayso, adigaa awooda gacanta ku haya oo xakamaynaya.”

• "Dollar kasta oo ku jira qaanada hantidayda waa shaqaale fiican, oo si adag u shaqeynaya si uu u sameeyo shaqaalayaal badan "dollar" oo aan ku iibsado baabuur Porsche cusub."

• Qoraaga waxa uu dadka xasuusinayaa in caqliga dhaqaaleed uu ku soo koobmo aqoon khibradeed oo loo yeesho afar dhinac oo ballaadhan oo kala ah:

1. Xisaabinta "Accounting"

2. Maalgelinta "Investing"

3. Fahamka suuqyada "Understanding markets"

4. Sharciga iyo xeerarka "The Law"

• "Shirkadda dakhliga soo galo, marka ay ka bixiso wax kasta oo ay awoodo, markaas ka dib wixii soo hara ayaa lagu canshuuraa. Waa mid ka mid ah daldaloolada cashuuraha sharciyeed ee ugu weyn ee ay maalqabeenadu adeegsadaan.”

• "xataa dunida dhabta ah, kuwa caqliga badan ma ahan kuwa horumara, laakiin waa geesiyada ama dadka dhiiran dadka horumara."

• Qoraaga wuxuu leeyahay, dhammaanteen waxaan leenahay karti, Haddana midda dhammaanteen dib inoo dhigta ayaa ah heerka uu la eg yahay shakiga aan ka qabno awoodeena.

• Waayo-aragnimada shakhsi ahaaneed ee Qoraaga, garaadka dhaqaale wuxuu u baahan yahay laba shey oo kala ah aqoonta farsamo iyo sidoo kale geesinimo/dhiiranaan.

• "Caqliga dhaqaaleed ayaa kaliya ah haysashada doorashooyin badan."

• "waxa kaliya ee ugu xoogga badan ee aan dhammaanteen haysanno waa maskaxdeena. Haddii si wanaagsan loo tababaro, waxay abuuri kartaa hanti aad u badan.”

• "Dunidu had iyo jeer waxay na siisaa fursadaha nolosha hal mar soo dhaca, maalin kasta oo nolosheena, laakiin inta badan waxaan ku guul darreysanaa inaan aragno fursadahaas."

• "Xisaabta fudud iyo caqliga saliimka ah ayaa ah waxa kaliya ee aad u baahan tahay si aad dhaqaale fiican sameyso."

• "Dhibaatada maalgashiga 'sugan' waa in inta badan ay nadiif yahay maal-gashiga heer uu qof walba ay u fududahay inuu go'aanka maal-gashiga qaato, taas oo ka dhigaysa in faa'iidooyinku ay yar yihiin."

• "Ma aha khamaar haddii aad ogtahay waxaad samaynayso. Waa khamaar haddii aad lacag galinayso ganacsi kadibna aad duco usoo jeedsanayso."

• "Dadka intooda badan weligood ma taajiri doonaan sababtoo ah uma tababarna dhaqaale ahaan si ay u aqoonsadaan fursadaha hortooda yeela."

• “Fursadaha waaweyn laguma arko indhaha. Maskaxda ayaa laga arkaa.”

• "JOB oo shaqo waxaa uu qoraaga leeyahay waa erey laga soo gaabiyay 'Just Over Broke'." oo ah "shiidnimo/saboolnimada darajada ka koraysa bas"

• "U fiirso dariiqa xirfadaha aad rabto in aad ceyrsato ka hor inta aanad dooran xirfadaas."

• "Waxbarashadu way ka qiimo badan tahay lacagta, marka loo fiiriyo mustaqbalka fog."

• "Sababta dad badan oo karti leh ay faqiir u yihiin ayaa ah iyagoo diiradda saara dhisidda hamburger wanaagsan iyagoo inyar ka og nidaamka ganacsiga."

• Xirfadaha maamul ee ugu muhiimsan ee looga baahan yahay guusha dhaqaale waa:

1. Maareynta qulqulka lacagta caddaanka ah

2. Maareynta nidaamyada ay ganacsiyadaada ku shaqeeyaan

3. Maamulka dadka kaa hoos shaqeeya.

• "Xirfadaha gaarka ah ee ugu muhiimsan shaqsi ahaan waa iibinta iyo suuq-geynta."

• "Si aan runtii hodan u noqono, waxaan u baahanahay inaan awoodno inaan wax bixinno iyo sidoo kale inaan helno."

• "Lacag bixinta waa sirta ugu weyn ee qoysaska ugu qanisan."

• "Farqiga u dhexeeya qofka qaniga ah iyo qofka faqiirka ah waa sida ay u maareeyaan cabsida."

• Waxaa jira shan sababood oo waaweyn oo ay dadka dhaqaalaha ku fiican ay weli u yeelan waayaan tiirar hanti badan oo soo saari kara lacag caddaan ah oo ballaaran. Shanta sababood waa:

1. Cabsida

2. Wahsiga

3. caajiska

4. Caadooyinka xun-xun

5. Kibirka

• "Dadka intooda badan, sababta aysan u guuleysan dhaqaale ahaan waa sababtoo ah xanuunka luminta lacagta ayaa aad ugula weyn farxadda taajirnimada ay ka filanayaan."

• "Guul-darradu waxay dhiirigelisaa guulaystayaasha. Guuldarradu waxay jabisaa kuwa nolosha ku qasaara.”

• Nooca ugu xun ee caajisnimo waa mashquulka badan.

• "Aabaha taajirka ah ayaa rumaysnaa in ereyada 'Ma awoodi karo' inay maskaxdaada xidhaan. 'Sideen ku awoodi karaa?' waxay kuu furaysaa fursado, xiiso, iyo riyooyin."

• "Mar kasta oo aad isku aragto inaad ka labalabaynayso wax aad ogtahay inay tahay inaad sameyso, markaas oo kale waxa kaliya ee aad is waydiin karto waa, 'Maxaan ka helayaa haddii aan qabto hawshaan?' Noqo mid hunguri badan in yar. Waa dawada ugu fiican ee caajisnimada aad ku daaweyn karto. "

• Qoraaga waxa uu oronayaa in dad badani ay u isticmaalaan kibirka si ay isugu dayaan in ay ku qariyaan jaahilnimadooda.

• “Meel walba dahab ayaa yaalla. Dadka intooda badan looma tababarin inay arkaan."

• "Si aan ugu guuleysano ' heshiisyo nolosha hal mar nasoo mara ama 'malyanka-dollar' waxaa nalooga baahan yahay inaan yeelano maskax maaliyadeed."

• ujeedada nololeed waa isku darka 'rabitaanadaada' iyo 'waxyaalaha aadan rabin'."

• "Dadka intooda badan waxay iibsadaan hantida ay maal-gashanayaan, halkii ay marka hore maalgelin lahaayeen barashada waxaas ay maalgashiga ku sameynayaan."

• Qoraaga waxa uu aaminsan yahay in mid ka mid ah shuruudaha ugu adag ee hanti-dhisidda ay tahay in aad naftaada run u sheegto oo aad diyaar u noqoto in aanad mari doonin wadada ay maraan dadka badankooda.

• "Su'aasha ugu horreysa ee la rabo inuu is weydiiyaan dadka rabaan inay casrigaan wax maal-gashtaan waa: 'Sidee ugu dhakhsiya badan ayaan dib ugu heli karaa lacagtii aan gashtay?'"

• Haddii qoraaga uu hal fikrad u dhaafi lahaa aqristayaasha, waa fikrada ah. Mar kasta oo aad dareento nusqaan ama aad u baahan tahay shay, bixi waxa aad rabto wax u qalma marka hore waxaana heli doontaa waxa aad rabto iyada oo baaldiyo ka buuxaan.